Өнөөдөр, өнөөдөр ч гэж дээ сүүлийн хэд хоног өөрөө өөртэйгээ баахан хэрэлдлээ. Сонин юм байна шүү. Нэг Гамбино гарч ирээд л намайг учир зүггүй дуртай үгээрээ хэлээд л байх юмаа. Тэнгэр газрын савсалганд над шиг муу, муухай амьтан байхгүй л гэнэ, хүүхнүүдийн хормойг сөхөх дуртай л гэнэ, архийг аягаар бус авдараар уудаг л гэнэ, хүссэн бүхнээ авахын тулд юугаа ч хайрладаггүй л гэнэ... За тэгээд сонсоод байсан чинь нарт хорвоо дээр яах гэж амьд явж байгаагаа ч мэдэх ээ болитол хараан зүхэх юм аа. Баахан загнуулсан би өөрийгөө нээрээ л хүний адаг юм байна гэж итгээд шидмэс бариад урд уул руу алхмаар санагдаж байна шүү.
Тэгсэн чинь бас намайг өмөөрөөд бас нэг Гамбино гараад ирлээ. Намайг хараан зүхээд байсан Гамбино руу чинь ёстой галт сумаар харвах шиг болж байнаа. Архи уувал ууж л байг эртхэн үхэж чи амрана, авгай хүүхэн эргүүлж л байг чамд амар байх цаг их байх гарна, хүссэн бүхнээ авч л байг илүү гарсаныг нь чамд заавал өгөх хүн гээд намайг өмөөрч байх юмаа. Гол нь намайг өмөөрөөд байсан Гамбино нь их зальтай нөхөр байлаа. Хаана нь дуугаа өндөрсгөж сүрдүүлэх вэ эсвэл хаана нь нөгөө ууртай хараадаг Гамбиног аргадах вэ гэдгээ бүхэл бүтэн 1000 хүнтэй найрал хөгжмийн оркестр удирдаж байгаа юм шиг чадамгай үзүүлсээр байгаад хараадаг Гамбино-оос надтай эвлэрэх тухай бичгэн баталгаа гаргуулж аваад ирж байна шүү. Хорвоо гэж яалтай ч билээ дээ...
No comments:
Post a Comment